Masyarakat Sumsel Dianjurkan Sholat Tarawih Dirumah Bae

0

Urban ID - Gubernur Sumsel, Herman Deru, nganjurke masyarakat biar jalanke ibadah solat teraweh saat bulan puaso di rumah bae. Imbauan ini salah sikok caro nyegah penularan virus corona yang teraher ini teros meluas di ‘Bumi Sriwijaya’.

“Pemerintah sebenernyo idak pernah ngelarang warga nak ibadah. Tapi dang kondisi cak ini ibadahnyo tolong gawekelah di rumah bae. Misalnyo solat teraweh pas puaso agek,” katonyo.
Herman Deru ngomong, anjuran ini juga sejalan samo surat edaran Menteri Agama RI, Fachrul Razi, soal solat teraweh di rumah selamo bulan puaso, 1441 Hijriah.
Masyarakat juga dimintak tetep disiplin jago jarak atau physical distancing, tujuannyo biar masalah penularan virus corona ini idak terus meluas.
“Payo tolong dulu kito samo-samo bejuang mutuske mato rante corona ini dengan jago jarak. Jadi ibadahnyo idak dilarang, tapi di rumah dewek-dewek,” katonyo.
Selaen itu, terkait urusan keagamaan ini, Herman Deru bakan nyerahke sepenuhnyo ke instansi samo organisasi keagamaan berwenang, cak MUI, NU, Muhammadiyah, samo yang laennyo. Sebab, mereka itu yang kagek nyampeke ke jemaahnyo tentang panduan cegah COVID-19 saat ngelaksanake peribadatan.
“Kito pemerintah ni cuma nganalisa bae soal anjuran dari organisasi yang berwenang,” katonyo.
Cak kito tau, Kementerian Agama telah ngeluarke surat edaran nomor 6 Tahun 2020 tentang “Panduan Ibadah Ramadan dan Idul Fitri 1 Syawal 1441 H di tengah Pandemi Wabah COVID-19 “.
Panduan itu buat nyegah, ngurangi penyebaran, samo ngelindungi masyarakat muslim dari risiko virus corona. Salah sikoknyo yolah gaweke teraweh samo tadarus di rumah selamo puaso. (abp)

LEAVE A REPLY

Please enter your comment!
Please enter your name here